زكي كبس الحرامي الغضبان ووراه الذل الوان

15.05.2016 | 11:23

"نعيد من خلال هذا الباب نشر محتويات صحف ومجلات قديمة من تراثنا ، وهنا ننشر بعض قصص صحيفة "الاولاد" المصرية التي صدرت بداية القرن الماضي ."

1- الواد زكي خلنجان، مشهور بالشقاوة من زمان، مرة معدي في الحارة، لقى الحرامي عامل غاره، وداخل البيت الجيران اللي هناك، ومحضر شوال يلم فيه سرقته تحت الشباك، الحرامي يا دوب نط من شباك أول دور وشويه وطب عليه زكي الخنزأور، وبص لقى الشوال، قال في عقل باله والله عال.

 

2- زكي فهم العبارة، وقال عيب ابقى في الحارة، ويخشها حرامي، ويسرق كده قدامي، وعنها ومسك طرف الكيس، وقال انا اهم من البوليس، الحرامي اول ما دخل البيت، شم ريحة سمك بيتقلى بزيت، عرف ان البيت فيه ناس وقف دايخ ومحتاس، وقال احسن يا واد، تهرب قبل ما تضحك عليك الاولاد.

 

3- الحرامي نط في الحال، وكان زكي جر الشوال، الحرامي نزل فيه اتكعبل، واتلبخ على عينه وانتيل، ولسه بيبص وراه ومبلوخ، خايف الاحد يقفشه و يدوخ، وراح زكي مجرجره، وبهدله وبحتره، وشقلبه على الحيطة، قام صرخ وعمل له زيطة، ولقى نفسه ضاع، وجسمه اتملا اوجاع.

 

4- وشويه وطب عليهم الشاويش، ودخل بشوية تهويش، وقال والله عفارم عليك، تعيش يا زكي وتسلم ايديك، قفشت لنا الرحامي الكبير، وبكره نحاسبه ولا ساب منكر ونكير، كل ده والحرامي مسخسخ، متلقح جنب الحيطة وهو مدروخ، مش فاهم ازاي ولد مفعوص، يغلبه هو سيد اللصوص.

 

5- الشاويش طلع جنيه، والحرامي مبحلق عينيه، وقال لزكي خد ده علشانك، وروح هيص بين اخوانك، واحكي لهم على شطارتك، وهمتك ومهارتك، زكي خد الجنيه وزاط، وقال دلوقت اشتري حلويات وبقسماط.

 

6- اول ما الحرامي شد حيله وفاق، اتعفرت وصدره ضاق، وراح مناول الشاويش بوكس برجله، وشكه مقلب شقلبه، ونزل فيه ضرب وتلطيش، وقال له استلم يا حضرة الشاويش.

 

7- الحرامي قام زي العفريت، وعينه قايده كأنها كبريت، وطار ورا زكي الغلبان، كأنه مارد من الجان، زكي قال مددك يا مليجي،وبقى مش عارف لا يروح ولا يجي، وعرف ان الحرامي ح يقفشه، ويخطف منه الورقة ام جنيه و يلبشه.

 

8- وعنها والحرامي حصله، وقال له هات الجنيه ووصله، ووقع الولد على الارض، وهو عمال يقرمش على سنانه ويعض، ووشه متشقلب وعينيه، زايغه نواحي الجنيه، في وقعة زكي الغلبان، الجنيه طار من ايديه حصل عند الحرامي نوع جنان، وفضل يفعص في زكي المسكين، ويوقول اه لو معاي سكين.

 

9- الهوا شال الجنيه، ما تعرفش ليه، وفضل يطوح فيه، كأنه بيغيظ الحرامي السفيه، الحرامي ساب زكي وعقله طار، وقال حلق يا جدع على الجنيه واقف له زنهار، والجنيه طار من فوق السور، عقل الحرامي اتبرجل وفضل يزن زي الدبور، واتبرجل تمام، من غير كلام، وقال مستحيل اعتق الجنيه، ولو اضيع نفسي عليه.

 

10- زكي قام وهو عدمان، وجسمه مضحضح وعنده دوران، لقى الحرامي زي الغول، هاجم على الورقة على طول، وعمال يمد ايديه، وعقله ودينه في الجنيه، زكي قال في عقل باله، الهي يكشف احواله، ويوعده بوقعه سوده، ويروح روحه مالهاش عودة، وينصرني عليه، ويرجع لي الجنيه، وما يروحش تعي بلاش، ويغلبني حتة راجل حشاش.

 

11- الحرامي لقى الجنيه عدى السور، فضل يبرم ويدور، ونط هو كمان، كأنه فارس من الفرسان، لاجل بخته النيل، وحظه المقندل، كان الشاويش راكب الاتومبيل، وداير نواحي النيل، يدور على الحرامي اياه، اللي هرب منه بعد ما كان وياه، وهو مش مخلصه يعترف بالهزيمة، ويرجع مقلول القيمة، ويتفضح بين الشاويشيه، ويبقى في هم ورزيه.

 

12- الحرامي نزل من الاتومبيل، واتلقح زي القتيل، والشاويش قال له آنست يا خفيف، حقيقة أنك لطيف، وفرت علي التعب والتدوير، وجيت بنفسك زي الامير، بال بقى على السجن وشرف هناك، واستقبل صنوف المذلة والهلاك، وعم زكي خد الجنيه واتفرفش، وهاص واتنعنش، وقال والله عال، الجنيه ده رزق حلال، جاني بعد التعب، ولما قلبي اضطرب.


TAG: كرتون