1- الملك حبظلم، ملك العبيد المشلظم، وراح يوم من الايام، يقابل الصياد الهمام، وقال له عايزين همتك يا امير، الا فيه نمر كبير، هايج في البلد، ومرعوب منه كل راجل وولد، الصياد قال له اطمن، واوعى تزعل والا تتعكنن.
2- وعنها وخد وياه ميمون، واخوه تنتون، ولاد ملك العبيد، ابو تاج حديد، وراح تحت شجرة هايلة، وكسر فرع من فروعها المايلة، وشقه شق كبير، وقال ادي مصيدة تصطاد النمر الكبير.
3- وبعد كده الصياد، ربط حبل زي المعتاد، وفي وتد متين، محطوط في الفرع التخين، واستخبى ورا الشجرة، وقعد متربص في القمرة، شوية والنمر جاي على ريحة اللحمة، وفضل يشمشم فيها من غير رحمة، ووقف مدلدل لسانه، وساق هبلة على جنانه.
4- النمر حط ايديه على الجذع المشقوق، الصياد قال وقعت يا حربوق، وراح شادد الوتد، جذع الشجرة طيق على ايدين النمر واتجبد، والنمر فضل يوحوح، وهو متكتف عمال يتطوح، والصياد راح الملك يبشره، انه اصطاد النمر اللي غير دمه وعكره، الملك اداله نشان، وشوية عاج ومرجان.
