زهر دراق.. بقلم: عبد الوهاب شرينه

شو عرف الليل السهر لولا القلب خفاق
نجمات تلمع بالسما شو تفضح الأشواق
حد الفرح لمسة حزن نظرة عتب و فراق

 

تاري السهر مثل الحلم ما ينكتب بوراق
متذكر البرد و دفا برد الطقس بس الدفا حراق
مسكين يلي ما نسي كل القصص العتاق

لا توقف بباب الزمن تسأل عن الغياب
حتى الزمن يمكن نسي متذكر و كذاب
شو عرفك إنو الزمن باب الزمن مو باب

وردات سور مبعثرة بين الورد عناب
شفاف بنت محيره تمسك بايدا كتاب
لما الهوى يكتب غزل ريحة مطر و تراب

حتى القلم عم يرتجف من كل حرف ينقال
تاري الحرف مثل السحر مثل الكحل و الخال
لا ترسمي جفونك ابد جفنك بحر و جبال

تحت الجفن واقف رمش مسلح و خيال
لحن انكتب ما هو لحن قبل اللحن موال
صارت قصيدة معلقة لا تخبري العزال
إنو السهر هو السهر و انت زهر دراق

https://www.facebook.com/you.write.syrianews