شارلي ما بيدفعش الإيجار

1- شارلي سكن في بيت خربان، حيطانه تنفد على الجيران، وصاحب الملك يحب الفلوس، وشكله شكل جاموس، ليل نهار يطالب شارلي بالاجرة، وشارلي يتمحك ويقول له ارجع لي بكره، وفي يوم جاله يتحنجل، عم شارلي اتدلدل، وقال له الاجرة موجودة، بس صلح حيطان البيت المهدودة.

 

 

2- والحقيقة ان مش الحيطة اللي عاوزة تتليس، وإنما شارلي هي اللي مفلس، ومافيش في جيبه إلا خمسة صاغ براني، شغل واحد زلباني، وشويتيتن والغلام نشله من الموت، وجاب له ورقة بنك نوت، شارلي رقص واتنط، وقال أهي فرجت الليلة ناكل و نشرب ونزأطط.

 

 

3- صاحب الملك شاف الورقة اتجنن، وقال ضروري أني اتحين، وراح هاجم زي الغول، ونتش الورقة من الغلام على طول، وناول شارلي بالشنطة في خلقته، وعوج له ضبته، وقال له إياك تقرب، لأني أنا دلوقت متكهرب، وآدي خمسة جنيه من أصل الإيجار، بعتهم لي ربنا على طلعة النهار.

 

4- شارلي قال له وهي دي أصول يا خواجه، قال له معلهش دي مش حاجة، وحط الورقة في الشنطة، وقعد يغني لها ويقول تعالي لي يا بطة، شارلي طلعت زرابينه، وده شيء احنا فاهمينه، راح متمطع من غير ما يقول كاني ولا ماني، وادى صاحب الملك شلوت ألماني.

 

5- صاحب الملك اتكهرب من الشلوت، واتهيأ له انه حيموت، وراح منطور نطرة تمام، دماغه دخلت في الحيطة قوام، شارلي قال له عاين بنفسك الحيطان، علشان تعرف انها عاوزة دهان، مش تجي تنط لي زي ابو قردان، وتعمل لي عظيم من الأعيان.

 

6- فضل صاحبنا في الحيطة مزنوق، وشارلي يضحك ويقول خليك عندك لغاية ما تفوق، وأخذ الورقة من الشنطة، وقال للقرد والغلام يلا بنا على لوكنده المحطة، ناكل كرشه وكوراع، وخلي البأف ينازع، علشان يحرم يخطف مال الناس، ويفضل كده محتاس ومنداس ونقفل الباب عليه بالترباس.

 

7- دخلوا اللوكنده وشارلي قعد وضرب الجرس، وقال هاتولي عموم الجرسونات والخدامين والحرس، الجرسون جه يشوف العبارة ايه، وقال في عقل باله لازم واحد بيه، الا وطب صاحب البيت الغلبان، بعدما نتع نفسه من وسط الحيطان، وناوي ياخد الورقة بأي طريقة ولو يقيد في اللوكنده حريقة.

 

8- حضرته قعد جنب شارلي على الكرسي الفاضي، وقال الله ما اعتقه الا قدام القاضي، و الجرسون جاب اللسته وقدمها لكل احترام، وشارلي قعد يقرا ويقول اللهم واعدنا بالفراخ والحمام والكنافة والمهلبية وتوب علينا من الئلعمية.

 

9- الجرسون عامل ذوق وابن بلد، شال الترابيزه وحب يجيب واحدة كبيرة تليق للعمد، صاحب الملك حب يسند كوعه على التبيزه ويرتاح، وشارلي رفع ايده و ضرب الجرس للجرسون يجيب له شوربه ولحمة وتفاح.

 

10- نزل دراع صاحب البيت على الفاضي، اتشقلب ونزلت ايد شارلي على البطحة اللي في راسه خلت دماغه تتلهب وبص لقاه وقع وشطح قدامه، واتدغدغت جتته واتهزل مقامه، وقال له هو انت برضه يا صبوه، والله اتحرمت من الغدوة، مين قال لك تجي ورايه، وتطمع في القرشين اللي معايه، ومين قال لك تطلع من الحيطة، وتجي هنا تعمل لنا دوشه وزيطه.

 

 

11- صاحب اللوكنده بص لهم بهباله، وقال يلزم يا بيه اجيب نقاله، شارلي قال له مافيش لزوم قل للجرسون يجيب مقشه، ويكنس الراجل ده ويرميه في أي عشة، وإلا يدلقه في مسقة الخيل، ويسهر عليه طول الليل، وحضر لنا الغدا يا خفيف، وابعت جوزين حمام وصحنين روزبيف، وهات للقرد شوية بندق وقدم الغلام قطايف بالفستق، وانده تكسي يستنا على الباب، وشوف يبقى كام كل الحساب، واجري قول لصاحب مجلة الأولاد اللطيفة، ينشر الحكاية دي في أول صحيفة.