تعلم من الصراف النحيل طريقة ضبط اللصوص بالبرميل

"نعيد من خلال هذا الباب نشر محتويات صحف ومجلات قديمة من تراثنا ، وهنا ننشر بعض قصص صحيفة "الاولاد" المصرية التي صدرت بداية القرن الماضي ."

1-  بالضرورة، حضرتك شايف أول صورة، قدامك واحد افندي شايل شنطة، وماشي ورا تمثال نهضة مصر اللي عند المحطة، اتاري حضرته صراف في بنك الخوص، شافه اخطر اللصوص، جاب حبل وقال لازم اربطه احسن ربطة، واخد من ايده الشنطة، ولو نعملها من باب المبسطة.

 

2- الحرامي جاب عصاية شوم، وحطها بين اكتاف الصراف خلاه يزوم، وبالحبل دارا كتافه، والغريبة ان لا البوليس شافه ولا الصراف قادر يدل حد على اوصافه، الصراف قال له يا شيخ حرام عليك، وقال له اسكت والا اقطع ايديك، واطلع حبابي عنيك، واخلي الجزمة تطلع من خلف صوابع رجليك.

 

3- الحرامي ساب الصراف مركون، وفتح الشنطة وقال اما الصراف ده احسن زبون، ويفضل يحسب يعمل ايه بالشيكات، وايه بالجنيهات، والصراف بيقول بعدين، اجيب اللي يخلصني منين، ودي مالية البنك، لو راحت ما يفضلش فيه ولا خمسة فرنك،و يشهر الافلاس، ويتهموني انا بالاختلاس.

 

4- اللطافة ان الصراف، بعد ما شاف، ان المسألة، بقت في غاية العرقلة، نظر إلى الجهة الشمال، شاف برميل عال، في قلبه فتحة دخل فيها الشومة، وشال البرميل وقال استعد يا وش البومة، وبسلامته الحرامي الملحوس، لسه فرحان بكتر الفلوس، وساعات يشمها بمناخيره وساعات يدلدل بوزه وينزل بوس.

 

5- شويتين والحرامي وجد نفسه مكبوس، ونسي عدد الفلوس، وفي البرميل بقا ملبوس، والشنطة وقعت على الارض، والصراف زعق والحرامي اتخض، سمعهم عسكري الدورية، جه يجري من نواحي محطة المطرية، وقال مين اللي بيزعق زي المجنون، وصحاني و انا مركون، على كوبري الليمون.

 

6- العسكري اول ما شرف، سمع الحرامي بيخرف، سحبه ووداه الكركون، فضل يهزي زي المجنون، اتاريه هربان من اضيق السجون، وعاملين مكافأة للي يضبطه داخل القطر او بره، وفي الحال سلم الصراف الصره، واخد الشنطه ومشي زي المجنون، والحرامي بيشتمه من شباك السجن.